МОНГОЛ УЛСЫН ЕРӨНХИЙ САЙДЫН 2024 ОНЫ 71 ДҮГЭЭР ЗАХИРАМЖААР БАТЛАГДСАН “ЭРЭГТЭЙ, ЭМЭГТЭЙ ХҮНИЙ ДУНДАЖ НАСЛАЛТЫН ЗӨРҮҮГ БАГАСГАХ ТАЛААР АВЧ ХЭРЭГЖҮҮЛЭХ АРГА ХЭМЖЭЭНИЙ ТӨЛӨВЛӨГӨӨ (2024-2027)”-Г ТАНИЛЦУУЛЛАА. Монгол Улсын Засгийн Газар, Жендэрийн Үндэсний Хороо Монгол Улсын Ерөнхий сайдын 71 дүгээр захирамжаар батлагдсан “Эрэгтэй, эмэгтэй хүний дундаж наслалтын зөрүүг багасгах талаар авч хэрэгжүүлэх арга хэмжээний төлөвлөгөө (2024-2027)”-г үндэсний хэмжээнд танилцуулах ажлыг зохион байгуулж байна. Энэ хүрээнд тус төлөвлөгөөний хэрэгжилтийг хангахад хувь нэмрээ оруулан ажиллах Дундговь аймгийн Засаг даргын тамгын газар болон Хүүхэд, гэр бүлийн хөгжил, хамгааллын газрын 16 албан хаагч нарт 2024 оны 10 сарын 29 өдөр тус төлөвлөгөөг танилцууллаа. Тус арга хэмжээг нээж газрын даргын албан үүргийг түр орлон гүйцэтгэгч Б.Уранбайгаль үг хэллээ. Уг арга хэмжээний үеэр эрэгтэй, эмэгтэй хүний дундаж наслалтын зөрүүг багасгах талаар авч хэрэгжүүлэх арга хэмжээний төлөвлөгөө болон цаашид хэрхэн хэрэгжүүлэх гарц, шийдлийн талаар Жендэрийн үндэсний хорооны ажлын албаны Эрэгтэйчүүдийн хөгжлийн асуудал хариуцсан мэргэжилтэн Д.Батхишиг мэдээлэл хийлээ. ДУНДГОВЬ АЙМГИЙН ХҮҮХЭД, ГЭР БҮЛИЙН ХӨГЖИЛ, ХАМГААЛЛЫН ГАЗАР

“ДЭЛХИЙН САНСРЫН 7 ХОНОГ” АРГА ХЭМЖЭЭ ӨНӨӨДӨР ХААЛТАА ХИЙЖ САЙН ДУРЫН ХҮҮХДҮҮДДЭЭ ТАЛАРХЛЫН ГЭРЧИЛГЭЭ ГАРДУУЛЛАА. Дэлхийн 100 гаруй оронд нэгэн зэрэг зохион байгуулагдаж байгаа шинжлэх ухааны арга хэмжээг Монгол Улсад 7 хоногийн турш орон даяар зохион байгууллаа. Тус арга хэмжээнд ерөнхий боловсролын сургуулийн 820 сурагчид хамрагдаж шинжлэх ухааны танин мэдэхүйн ертөнцөөр аялцгаалаа. Тус арга хэмжээг Хүүхэд, гэр бүлийн хөгжил, хамгааллын ерөнхий газар, UNITEL HUB, UNITEL салбар, Дундговь аймгийн Музей, Тэнгэрийн тэмдэг хүүхдийн театр, Байгаль орчин, аялал жуулчлалын газар, Төрийн бус байгууллагын сургагч багш Э.Мөнхжаргал, аймгийн Хүүхдийн зөвлөл, Сайн дурын хүүхдүүдтэй хамтран амжилттай зохион байгууллаа. Хамтран ажилласан та бүхэндээ талархал илэрхийлье. ДУНДГОВЬ АЙМГИЙН ХҮҮХЭД, ГЭР БҮЛИЙН ХӨГЖИЛ, ХАМГААЛЛЫН ГАЗАР

Өсвөрийн парламент-2023 хөтөлбөрийн оролцогч хүүхдүүд “Эрүүл орчин-Эрүүл хүүхэд” нөлөөллийн аяны хүрээнд ерөнхий боловсролын сургуулиудад цэвэр ус, ариун цэврийн хэрэглэгдэхүүн хүртээмжтэй, шаардлага хангаж байгааг үнэлэх зорилгоор Мандал, Эрдмийн далай цогцолбор сургууль, Цэгц билиг сургуулиудын орчинд үнэлгээ хийлээ. Үүнд: ✅Ундны ус ✅Ариун цэврийн өрөө ✅Гарын эрүүл ахуй Хамтран ажилласан: Дундговь аймгийн Эрүүл мэндийн газрын Орчны эрүүл мэндийн асуудал хариуцсан мэргэжилтэн Б.Ширчмаа-д талархал илэрхийлье. ДУНДГОВЬ АЙМГИЙН ХҮҮХЭД, ГЭР БҮЛИЙН ХӨГЖИЛ, ХАМГААЛЛЫН ГАЗАР

Дундговь аймгийн Засаг даргын Тамгын газрын Залуучуудын хөгжлийн төвтэй хамтран Олон улсын эмэгтэйчүүдийн эрхийг хамгаалах өдрийг тохиолдуулан Охид, эмэгтэйчүүдийн эсрэг үйлдэгдэж буй жендерт суурилсан хүчирхийллийг эсэргүүцэх, тэдний эдийн засаг, сэтгэл санаа, бие махбод, бэлгийн эрх чөлөө хэрхэн зөрчигдөж буй, үүнийг таслан зогсооход нийгмийн ойлголт, хандлага, мэдлэгийг нэмэгдүүлж, эмэгтэйчүүдийг хүчирхэгжүүлэх зорилгоор “Нэг тэрбумаараа тэмцье” эмэгтэйчүүдийн эрх чөлөөний алхалтыг зохион байгууллаа. Тус эрх чөлөөний алхалтад төрийн байгууллага, аж ахуйн нэгжийн 200 гаруй албан хаагч болон иргэд, сурагчдын төлөөлөл оролцож, үзэл бодол, үйл хөдлөлөөрөө нэгдлээ. ДУНДГОВЬ АЙМГИЙН ХҮҮХЭД, ГЭР БҮЛИЙН ХӨГЖИЛ, ХАМГААЛЛЫН ГАЗАР